KОВИД-19 може да остави некои луѓе со трајни проблеми со меморијата долго откако нивната инфекција ќе исчезне, покажа новото истражување. Овие наоди се особено изразени кај оние кои страдале од најраните варијанти на вирусот.
KОВИД-19 е познат по своите респираторни симптоми. Но, изгледа дека САРС-КоВ-2, вирусот што ја предизвикува инфекцијата, може да влијае и на нашиот мозок. Мозочната магла, когнитивните дефицити и губењето на мирисот и вкусот се најчесто пријавени симптоми на вирусот, а некои ги пријавуваат овие невролошки симптоми долго откако првичната инфекција ќе се смири.
Научниците не се сосема сигурни зошто вирусот ги предизвикува овие симптоми, иако лабораториските студии покажаа дека вирусот може да ја наруши заштитната бариера што го опкружува нашиот мозок и спречува туѓи супстанции, како вируси, да влезат. Истражувањето исто така покажа дека вирусот влијае на способноста на нашите мозочни клетки да комуницираат едни со други, произведувајќи премногу или премалку клучни сигнални молекули во мозокот.
Во новото истражување, објавено во списанието eClinicalMedicine, истражувачите од Империјал колеџот во Лондон, Кралскиот колеџ во Лондон и болницата на Универзитетскиот колеџ во Лондон во Обединетото Кралство ја истражуваа перзистенцијата на овие когнитивни симптоми дури и по поблаги инфекции со Ковид-19.
Во студијата, 18 невакцинирани доброволци без претходна изложеност на САРС-КоВ-2 биле намерно инфицирани со вирусот и редовно следени во период од 360 дена. Нивната когнитивна функција била мерена во различни периоди во текот на студијата и споредена со онаа пред да бидат заразени. Тие биле споредувани и со 16 волонтери кои не биле заразени со вирусот.
-Ова е прва и веројатно ќе биде единствената студија за човечки предизвик што ќе биде спроведена со Wildtype SarS-CoV-2 кај луѓе кои не биле вакцинирани и кои претходно не го имале вирусот, рече водечкиот автор на студијата Адам Хемпшир, професор по когнитивна и компјутерска невронаука на Кралскиот колеџ во Лондон.
Воедно ова е прва студија која применува детални и чувствителни проценки на когнитивните перформанси од пред до постинфекција под контролирани услови. Со тоа студијата дава уникатни сознанија за промените што се случиле во когнитивната и мемориската функција кај оние кои имале КОВИД-19 во првите фази од пандемијата.