Безбедносните пропусти на пребарувачот на „Microsoft“, Internet Explorer, им овозможуваат на хакерите да ја преземат контролата врз вашиот компјутер и да ви ги украдат лозинките, предупреди вчера Дериен Грем Смит, уредник на онлајн магазинот „PC Pro“.
- Срамота е што „Microsoft“ веднаш не ги решил проблемите со пребарувачот, вели Грем Смит
Џон Карен, шеф на Microsoft Windows group за Велика Британија изјави дека светскиот софтверски гигант настојува што побргу да го реши проблемот со пребарувачот.
- Во моментов овој проблем се јавува само кај 0,02 отсто од сајтовите во светот. Се чини дека засега проблемот се однесува само на седмата генерација на IE, но тој би можел да се пренесе и на другите верзии на пребарувачот. Не можеме само поради овај пропуст да им препорачаме на луѓето да ги користат конкурентските пребарувачи, изјави Карен.
Другите пребарувачи Firefox, Opera, Chrome и Safari, за сега не покажаа ранливост на сајтовите каде што се случуваа безбедносните пропусти на IE. Истражувањата покажаа дека овие безбедносни пропусти се јавуваат кај околу 10.000 сајтови.
Според Рик Фергусон, советник за безбедност во „Trend micro“ овој пат хакерите ги пронајдоа пропустите пред тоа да го направи „ Microsoft“.
- Забележавме дека овие пропусти се користат за крадење на лозинките за видео игри, но неизбежно е дека и посериозните хакери ќе настојуваат да ги искористат овие грешки за сопствени цели, вели Фергусон.