Од вчера во Скопје започна да функционира проектот „Безбеден Град“ , што значи дека веќе втор ден 100-те камери кои пред скоро 2 години беа поставени по улиците на главниот град се ставени во функција. Тие вршат 24-часовен мониторинг на улиците, раскрсниците и мостовите. Тие ќе снимаат прекршоци, сообраќајки, инциденти, криминални дела, а ќе служат и за регулирање на густината во сообраќајот. Како што објавивме и вчера, казните за прекршоците фатени со камерата ќе стигнуваат на домашна адреса.
Доколку сакате да бидете примерни во сообраќајот, а и да заштедите пари тогаш Trapster е вистинската апликација за вас. Се работи за бесплатна мобилна апликација преку која се обележуваат секакви настани кои би влијаеле на вашето патување со возилото. Корисниците во Trapster одбележуваат камери, оштетувања на патот, полициски замки, радари, па дури и места каде полицијата најчесто се крие. Покрај тоа, корисниците информациите можат да ги споделуваат преку Facebook и Twitter.
Апликацијата користи Wi-Fi или 3G мрежа и GPS со цел да ја најде вашата моментална локација, па според околината во која се наближувате апликацијата праќа аудио или текст пораки за можните опасности. Добрата работа е тоа што корисниците едноставно можат да додаваат нови информации за состојбата на патиштата, а тоа значи дека мапите во апликацијата секојдневно се надградуваат. Информациите за камерите и радарите остануваат на мапата засекогаш, додека полициските патроли се видливи само еден час.
Според мапата на Trapster, во Скопје се обележани скоро сите камери, доколку некоја фали, слободно додадете ја. Се надеваме дека во нашиот главен град сообраќајот ќе биде побезбеден, без притоа граѓаните да треба да плаќаат казни. Преземете ја Trapster бесплатно за Android или iOS.