„Нема друга“ е роман романса, а може да се каже и роман комедија. Матјаж, фотограф по професија, ја прекинува долгогодишната врска со својата девојка Сара и, наместо да се обиде да ја преболи, се препушта на самосожалување и на смислување планови како да ја врати назад.
Токму поради тоа, Сара одбива секаков контакт со него. Матјаж смета дека најлесно ќе ѝ се приближи само ако покаже дека ја преболел. Тоа го прави така што почнува да се гледа со други девојки. Ја почнува својата одисеја од една до друга девојка, секоја различна, од идеалистки и феминистки до романтичарки што го чекаат принцот на бел коњ.
Југословенската историја е секогаш во заднината на овој роман. Постои одредена доза на (наводна) носталгија за старите добри денови, но Матјаж живее со една поинаква, посилна носталгија, за деновите поминати со Сара.
Секое ново поглавје носи наслов на нова девојка и претставува нова „љубовна авантура“ што не води никаде.
Можеби оваа социјална реалност на романот не ослободува, како што би се очекувало од класичната романтична комедија, но несомнено ќе ве насмее.
Авторката успева да направи еден бескомпромисен портрет на современото општество, дефинирано од страна на наивниот постмодерен хедонизам. Врските на Матјаж не излегуваат надвор од површинското, од детските досетки и од тривијалните разговори, кои, всушност, се обид што побрзо една жена да се однесе во кревет како тоа да е кулминацијата и суштината на љубовната врска. Но ќе може ли некоја да ја замени Сара? Ќе успее ли Матјаж да ја врати? Го сака ли навистина тоа?
Во секој случај, „Нема друга“ е малку повеќе од забавна романса и го најавува доаѓање на еден забавен, хумористичен, свеж, нов глас во современата „женска“ проза.
ИДИВИДИ во соработка со издавачката куќа „Антолог“ ќе доделат примерок од романот „Нема друга“ од Јела Кречич на еден од вас по случаен избор. Сè што треба да направите е во коментар на овој линк, кој е споделен на нашиот официјален Facebook профил, да го тагнете оној кому би му ја подариле оваа книга доколку ја освоите, а воедно и јавно да ја споделите оваа вест.