Panairi i nëntë udhëtues i librit shqiptar përfundon në Strugë

Strugë, 24 maj 2012 (MIA) - Struga është nikoqire e manifestimit përfundimtar nga karvani "Panairi i librit shqiptar", që kaloi nëpër Kumanovë, Tetovë, Gostivar, SHkup dhe Kërçovë. Bëhet fjalë për panairin e nëntë që e organizon Lidhja e botuesve shqiptarë.

Struganët kanë mundësi të njihen me botimet më të reja nga autorë vendor dhe botëror, të përkthyer në gjuhën shqipe. Marrin pjesë 14 botues nga Maqedonia, Shqipëria dhe Kosova.

"Ua ofrojmë qytetarëve titujt më të ri, por ka edhe nga vitet e kaluara, siç janë libra me poezi, prozë, beletristikë. Interesi është shumë i madh tek qytetarët, por mund të them se nuk disponojmë me shumë para në mënyrë që të mund të botojmë dhe shtypim shumë më tepër libra. Nëntë vite e organizojmë këtë karvan i cili zgjat një muaj dhe jemi mjaft të kënaqur nga ajo se çfarë është interesi tek lexuesit", deklaroi Sevim mehmeti, kryetar i Lidhjes së botuesve shqiptarë.

Ai shpreson se nga viti i ardhshëm edhe botuesit maqedonas do të jenë pjesë e panairit, ndërsa ideja e tyre është që ai të mbahet edhe në Ohër.

Panairi i librit shqiptar në Strugë mbahet në vend të hapur, në urën e Drinit të Zi.