Со победите во првите натпревари од осминафиналната група, репрезентациите на Македонија и на Русија обезбедија четвртфинале на Европското првенство во кошарка што се одржува во Литванија.
Во „Сименс Арена“ во Вилнус, најпрвин Македонија ја совлада Грузија со 65:63, а потоа Русија славеше победа против Финска 79:60. Во третиот натпревар од групата „Ф“, Грција триумфираше против Словенија со 69:60 и се наоѓа на третото место во групата.
На табелата со по 6 бодови водат Македонија и Русија, Грција има 5, Словенија 4, а Финска и Грузија по 3.
Денеска на ЕП се играат натпреварите од 2.коло од групата „Е“. Во 14:30 часот во реприза на финалето од последното ЕП во Полска играат Шпанија и Србија. Германија и Турција играат од 17 часот, додека во 20 часот е дуелот на домаќинот Литванија против Франција.
Од оваа група Франција со 6 бодови е во четвртфиналето и е лидер на табелата, а потоа следуваат Шпанија и Литванија со по 5, Србија и Турција имаат по 4, а Германија е последна со 3.