УЕФА по спроведената истрага по покренатото обвинение против двократниот македонски шампион Победа , од минатиот месец , изрече казна со која го суспендира прилепскиот клуб од европски настапи во наредните 8 години и доживотна забрана за било каква активност во фудбалот на претседателот Александар Забрчанец и поранешниот капитен Николче Здравевски. Казната е изречена по обвинението за местење на натпреварите со ФК Пјуник во рамките на квалификациите за Лигата на Шампионите во јули 2004г.
Во својство на набљудувач 7-часовниот состанок на кој присуствуваа сведоците на обвинението и претседателот на ФК Победа го следеше и генералниот секретар на ФФМ, Никола Костов кој доцна синоќа се врати од Нион:
"Состанокот беше класично испитување од страна на комисијата на УЕФА на која застапникот на ФК Победа и претседателот Забрчанец ги презентираа своите изјави и ставови во однос на обвинението за местење на средбите со ФК Пјуник. На сослушувањето беа презентирани и фактите на комисијата врз кои се темели ова обвинување, како исказ на стручно лице за следење на коефициентите на обложувалниците а во улога на клучен сведок и информатор се појави спортскиот новинар Миленко Неделковски. Потоа беше донесена одлуката која веќе и е позната на јавноста на која ФК Победа во рок од три дена има право на жалба. Ние како федерација ќе го следиме случајот до крај и по донесената одлука на второстепената инстанца во согласност со нашиот статут и правилниците ќе ги спроведеме препораките и одлуките на УЕФА." - изјави генералниот секретар на ФФМ, Костов за веб сајтот на националната фудбалска куќа.