И покрај тоа што за денеска беше најавено одржувањето на состанокот на Арбитражната комисија при италијанската Калчо лига околу разгледувањето на барањето на нашиот најдобар фудбалер Горан Пандев за раскин на договорот со Лацио, сепак, истиот се очекува да биде повторно одложен откако според пишувањата на италијанските медиуми треба повторно да биде конституиран нов состав на комисијата.
"Ситуацијата е навистина збунувачка. Тешка е слободата за нашиот фудбалер. Очекуваме да видиме кој ќе биде новиот член претставник на италијанската лига во комисијата, а потоа да се види и кој ќе ја носи конечната одлука", вели агентот на Пандев, Карло Палавичино, кој, сепак, очекува до крајот на актуелнава година нашиот фудбалер да замине од Лацио.
Во меѓувреме и италијанската фудбалска легенда и поранешен тренер на Лацио, Дино Ѕоф јасно нагласува дека кризата во која се западнати "лацијалите" неизбежна е и поради отсуството на Горан Пандев.
"Факт е дека проблемите на Лацио оваа сезона се поради тоа што им недостасуваат двајца важни фудбалери како Пандев и Ледезма. Не сакам да навлегувам во тоа кој е виновен а кој не, но едноставно таа е реалноста", коментира Ѕоф откако италијанските медиуми деновиве се повеќе ја нагласуваат извонредната игра на нашиот фудбалер во репрезентацијата и последните шест постигнати погодоци изминативе три месеци.