По скандалозниот чин на една од најпознатите австралиски ТВ станици која во најавата за средбата меѓу Интер и Џенова од италијанскиот шампионат Горан Пандев го квалификуваше како Бугарин, најдобриот македонски фудбалер вчера со своја реакција за "Македонски спорт" нагласувајќи дека отсекогаш бил и ќе биде само горд Македонец...
"Јас не сум и не знам да бидам ништо друго освен горд Македонец. Непотребно е покренат прав околу целиот тој случај затоа што јас сум роден Македонец, ја сакам својата земја и од срце настапувам во националниот дрес", ни изјави вчера Пандев, притоа дополнувајќи:
"Сакам да им заблагодарам на нашите иселеници од Австралија кои застанаа во одбрана на моето име и Македонија. Разно-разни приказни се слушаа овие денови, меѓутоа вистината е дека македонската гордост секогаш ја носам со себе, јасно нагласувајќи во секоја пригода и при моите настапи во Италија и во Европа кој сум, што сум и од каде сум, и така ќе биде засекогаш и во иднина", вели Пандев, кој е револтиран и од одредени приказни кои се појавија во нашава земја дека веќе има бугарски пасош.
"Јас имам само македонски пасош и никогаш досега ниту сум помислил да извадам бугарски пасош. Непотребно се прават лажни приказни, измислени филмови кои никому не помагаат. Ќе им порачам на сите во светот на кои им пречи македонското име, дека нашата битка, заедно и со моите соиграчи од репрезентацијата, ќе ја водиме и извојуваме на зелениот терен докажувајќи им на сите низ претстојниот квалификациски циклус за вистинските вредности на Македонија. Ќе повторам дека нема потреба да се прават понатаму драматични тензии околу моето име од овој тип затоа што Македонија е единствено во моето срце", истакнува Горан Пандев.