На квалицикацискиот меч Република Ирска - Македонија на трибините на стадионот "Авива" биле скаутите на италијанскиот тим Фиорентина. Тие заминале во Даблин да ги скенираат квалитетите на македонскиот репрезентативец Горан Попов. Левиот бек кој е член на украинскиот тим Динамо Киев станува се поинтересен за клубови од најдобрите 5 лиги во Европа.
"По добрите игри за Динамо Киев и за репрезентацијата се поголем е интересот за Попов. Фиорентина е само една од екипите која има интерес за нашиот фудбалер. Трансферот во Динамо Киев е полн погодок и се уште е рано да размислува за заминување", коментира Роберт Ѓорчески, кој е десната рака на менаџерот Ален Аугустинчиќ со кој се реализираше трансферот на Попов во Украина.
Според тоа што го дознавме "најзагреани" за услугите на Попов се екипи од Италија, а Фиорентина е прва која праќа луѓе да го гледаат игрите на левиот бек.
Сепак, и покрај ваквите вести за интерес за Попов мали се шансите летово тој да направи трансфер. Се уште нема цела година од неговото заминување во Динамо Киев, а тимот од Украина бара сума од 6 до 15 милиони евра како отштета. Попов и најтрофејниот тим од Украина имаат договор до 2015 година.
Идеално време за трансфер за Попов би бил летниот преоден рок во 2012 година иако ако неговиот клуб добие добра понуда не е исклучена можноста тој да биде продаден уште ова лето.