|
|
|
Ќе бидат соиграчи - Нејмар во дуел со Пујол | |
Вчерашното издание на каталонскиот весник "Спорт" излезе со насловна страница на која во прв план е Нејмар, а до него стои наслов во кој се вели дека тој го ставил потписот на договор со екипата на Барселона и ќе биде играч на Каталонците во период од четири години.
Со ова се става крај на шпекулациите каде Нејмар ќе ја продолжи кариерата и станува повеќе од јасно дека составот на Барселона добива квалитетно засилување во нападот. Покрај должината на договорот објавено е и колку ќе добие Нејмар за престојот на Ноу Камп. Сумата ќе биде седум милиони евра по сезона, а воедно постои опција за продолжување на договорот за уште една година. Секако доколку тој одигра добро по пристигнувањето меѓу Каталонците сигурно ќе има и подолго продолжување на соработката.
Иако во последните неколку денови Сантос демантираше дека овој тим добил пари од Барселона за да го чува Нејмар и да има "пол-позиција" во преговорите доколку се појават и други екипи кои ќе сакаат да го ангажираат, сепак, вестите кои вчера беа објавени ставаат до знаење дека имало преговори кои траеле уште од мечот меѓу Реал и Барса кој се одигра во Мадрид.
Росел не сака да препушти ништо на случајот и е решен да се избори за триумф над Реал и надвор од терените и да ангажира играч кој долго време е главна цел на "кралевите". Во прилог му одат и изјавите коишто Нејмар ги даваше по Светското клупско првенство кога практично молеше да го земат на Ноу Камп.
Сепак, вчера немаше прецизна информација дали стартот на договорот меѓу Нејмар и Барселона ќе стартува веќе од 1 јануари или тоа ќе се случи по завршувањето на актуелната сезона. Нејмар е дефинитивно потребен после повредата на Виља, но дефинитивно никој не сака да брза со неговото пристигнување во Барселона, па затоа би можело да дојде дури во текот на летото во 2012 година.