Колку бил изнервиран од играта на нашите репрезентативци на последниот квалификациски натпревар, против репрезентацијата на Хрватска, покажува изјавата на нашиот селектор Чедомир Јаневски дека ако имал пушка морал во сите да пука.
Предводникот на нашиот национален тим додаде дека и утрешниот натпревар против Србија на "Националната Арена Филип Втори'' е од големо значење, а истиот може да има среќен крај само ако неговите избраници не ги повторат грешките кои ги направија на претходниот натпревар против Хрватска.
- Очекувам подобри додавања, побрзо да ја напуштиме нашата половина, да бидеме сконцентрирани од првата до последната минута. Не смееме да ги повториме грешките кои ги направивме против Хрватска. Разговарав со фудбалерите, знаат каде згрешија. Ако земев пушка после натпреварот, ќе требаше во сите да пукам, изјави Јаневски.
Предводникот на "црвено-жолтите'' додаде дека ќе има неколку измени кога е во прашање почетниот состав и дека е посветено екстра внимание на прекините.
- Работевме на прекините. Сепак во тие моменти пресудна е концентрацијата, одлучноста, реакцијата на фудбалерот. Ќе има неколку измени во почетниот состав. Освен Пандев, нема да игра и Шиков. Ќе одморам неколку фудбалери, а некои ќе добијат поголема минутажа. Да покажеме дека имавме само еден лош ден, дека сме квалитетни, дека можеме да освоиме три бода, изјави Јаневски.