Душан Кнежевиќ, центарот на шампионот Фени Индустри, со „дабл-дабл“ учинок од 27 поени и 13 скокови, на дуелот против Лирија, го освои признанието за најкорисен играч на колото.
Српскиот кошаркарски интернационалец имаше најголем придонес за пресвртот кој го направи Фени во второто полувреме и не дозволи кавадарчани првпат сезонава да загубат на свој терен.
Кнежевиќ за 34 минути поминати на паркетот постигна 27 поени (12 погодоци од 19 обиди), оствари 13 скокови (6 офанзивни), 3 асистенции и по една блокада и украдена топка. Според овој учинок играчот на Фени Индустри собра 40 МВП индекс-поени, најмногу во осмото суперлигашко коло.
Покрај за Душан Кнежевиќ, за место во најдобрата петорка на колото се изборија Владимир Зујовиќ (33 МВП индекс) и Немања Јелесијевиќ (32 МВП индекс) од Работнички, Балша Радуновиќ од Лирија (32 МВП индекс) и Димитар Караџовски од Торус СЦБТ (31 МВП индекс).