Првите олимпијци кои ќе се натпреваруваат на претстојните Олимписки Игри во Лондон, што започнуваат за 11 дена, пристигнуваат денеска во британскиот главен град.
Како што јави дописникот на МИА од Лондон, на аеродромот Хитроу пристигнуваат првите 335 спортисти и нивните тренери, меѓу кои се наоѓаат олимпијци од САД, Канада, Јапонија, Кина, Русија и Франција.
Денеска свечено се отвораат и вратите на Олимпискиот Парк, каде се наоѓаат сите главни олимписки терени и објекти, а вратите за странските спортисти ги отвораат и главниот олимписки стадион и Олимпиското село.
Од ноќеска на полноќ беше промовирана и специјалната „олимписка лента“ на патиштата што водат од аеродромот Хитроу, каде ќе пристигнат 80 отсто од спортистите и по дел од улиците низ Лондон, што се обележени за користење само за возилата што ги превезуваат олимпијците од разни земји.
Повеќето од спортистите доаѓаат порано за да се аклиматизираат на временските прилики во Велика Британија, а посебно во британскиот главен град, кои ова лето се соочуваат со врнежи какви што немало со децении наназад и со температури што се несоодствени дури и за она што се нарекува „британско лето“.
Денеска во Лондон одново врне дожд, а температурата нема да се искачи повеќе од 18 степени. Метеоролозите, засега, не се осмелуваат да кажат какво ќе биде времето за време на отворањето на 27 јули, како и до средината на август до кога ќе трае лондонската Олимпијада.
Олимпијците од големите светски спортски сили имаат од порано закупени центри за тренинг и аклиматизација во разни делови на Англија, што ќе ги користат како свои бази, до пред почнувањето на Олимпијадата.