Женската ракометна репрезентација на Македонија се враќа со убедлив триумф од 33:19 од гостувањето во Каунас, каде вчера ја декласираше домашната селекција на Литванија. Во претпоследниот дуел од квалификациската група "7" нашите девојки се изборија за втората победа со која се враќаат во трка за второто место на табелата кое обезбедува пласман на првенството на Стариот континент.
Со доминантна игра и во првиот и во вториот дел од мечот, нашите ракометарки не дозволија никакво изненадување од подлмадениот состав на Литванија.
Првото полувреме го завршивме со водство од 18:9, а во вториот дел продолживме во ист стил.
Најефикасна на тој дуел во нашиот тим беше Пецевска со 7 гола, а по 5 гола постигнаа Тодоровска и Бајрамовска. Во вториот дел шанса добија и помладите, па домашните успеаја да намалат од високата предност.
Клучниот меч за пласман на Европското првенство, Македонија ќе го одигра в недела во Скопје против Холандија.