Загреб, 15 април 2012 (МИА) – Ракометарите на Вардар ПРО се победници во првата сезона од регионалната СЕХА лига, откако вечерва во македонското финале од ова меѓународно натпреварување го совладаа Металург со 21:18.
Вардар ПРО по вчерашната елиминација на првиот фаворит на „фајнл фор“ турнирот домаќинот Загреб, денеска го победи и вториот фаворит, македонскиот шампион Металург и сосема заслужено го освои шампионскиот пехар.
Металург во неколку наврати имаше предност од пет и од шест голови разлика, но „црвено-црните“ не се предаваа, постојано ја бркаа разликата на противникот за во 52.минута да дојдат до изедначување 17:17. Во финишот вардарците влегоа со психолошка предност и физички посвежи што резултираше со четири постигнати и само еден примен гол за конечен триумф од 21:18.
Најефикасен играч на натпреварот беше Жарко Марковиќ, но неговите 7 голови не беа доволни да се спречи поразот на Металург. Во победничката екипа најефикасни беа Јан Собол со 6 голови и Филип Лазаров кој погоди 4 пати.
Во натпревар за третото место во загрбеска „Арена“ домаќинот Загреб КО го победи словачкиот претставник Татран Прешов со 31:29.