Навивачите на македонските репрезентативни селекции обединети под името „Македонска фаланга“ за својата лојалност и бодрење на ракометната репрезентација на олимпискиот квалификациски турнир во Гетеборг (Шведска), добија признание од претседателот на Меѓународната ракометна асоцијација - ИХФ, Хасан Мустафа.
Првиот човек на ИХФ испрати писмо до Ракометната федерација на Македонија во кое ги искажува своите импресии од начинот на кој „фалангата“ и даваше поддршка на репрезентацијата.
- ИХФ би сакала да изрази благодарност до навивачите на македонската ракометна репрезентација за нивната лојалност кон националниот тим за време на олимписките квалификации кои се одржаа во Гетеборг, стои во пофалницата на Меѓународната ракометна асоцијација.