Стомачен вирус: Симптоми, лекување и исхрана

Стомачниот вирус обично е предизвикан од вируси кои лесно се пренесуваат преку контаминирана храна или контакт со инфицирани лица.

Со правилен одмор, хидратација и внимателно следење на исхраната, можете да го пребродите со минимални компликации.

Симптоми на стомачен вирус

Кога ќе се разболите од стомачен вирус, најчесто ќе почувствувате:

• Мачнини и повраќање – почетниот симптом, кој може да се јави неколку часа по инфекцијата.
• Дијареа – честа и водена столица, која може да биде мошне исцрпувачка
• Абдоминална болка и грчеви – болна и непријатна болка во стомакот
• Треска – еден од симптомите може да биде и лесна треска
• Главоболка и умор – чувството на исцрпеност и замор често е резултат на дехидрација.
• Загуба на апетит – многу луѓе не чувствуваат желба за јадење поради болката и мачнините.

Лекување и справување со стомачниот вирус

Останете хидрирани – Дехидрацијата е главен проблем кај стомачните вируси поради повраќањето и дијареата. Пијте многу течности како вода или специјални раствори за хидратација, кои се достапни во аптеките.

Одмарајте –избегнувајте физички напор.

Лекови против повраќање -лековите против повраќање може да се користат, но само по консултација со лекар

Лекови против дијареа – Иако овие лекови можат да бидат корисни во некои случаи, не треба да се користат доколку имате висока температура или крв во столицата, бидејќи тоа може да ја влоши состојбата.

Храна која треба да се избегнува

• Масна и зачинета храна – Храната која е тешка за варење може да ја влоши состојбата. Избегнувајте масни јадења, пржена храна и храна која содржи многу зачини.
• Млечни производи – Млекото и млечните производи можат да предизвикаат дополнителна непријатност, особено ако имате нетолеранција на лактоза поради гастроентеритисот.
• Алкохол и кофеин – Овие супстанции можат да ја зголемат дехидрацијата и да ја иритираат стомачната слузокожа.
• Цитрусни овошја – Поради високата киселост, цитрусите може да ја влошат иритацијата на стомакот.

Храна која е препорачлива

• Лесни јадења – лесни оброци како што се бел ориз, печени компири и варено пилешко филе се добра опција за враќање на енергијата
• Тост и крекери –се добри избори за враќање на апетитот, се додека се без јаки зачини и масла.
• Банани – тие се лесни за варење и помагаат при враќање на електролитите во организмот.
• Јаболка – јаболките се благотворни за стомакот и можат да се консумираат во форма на компот или свежи.
• Супи и чорби – лесни, бистри, домашни супи без маснотии ќе ви помогнат да бидете хидрирани и да го смирите стомакот.

Што треба да направите за да се заштитите од стомачниот вирус?

Практикувајте добра хигиена – Често мијте ги рацете, особено по одењето во тоалет или пред јадење.

Избегнувајте контакт со инфицирани лица – Ако некој во вашето семејство или на работа е болен, избегнувајте блиски контакти.

Чистете ги површините – Редовно чистете ги површините кои доаѓаат во контакт со храна или се допирани од многу луѓе.

Јадете безбедна храна – Бидете внимателни со храната што ја јадете, особено ако е подготвена или складирана неправилно.

Кога да се консултирате со лекар?

• Ако симптомите траат подолгу од 48 часа
• Ако имате висока температура или крв во столицата
• Ако имате тешка болка или не можете да задржите течности во телото поради повраќање
• Ако се појават знаци на дехидрација, како што се суви усни, ретко мокрење и слабост