Претставниците на српската опозиција најавија дека на денешната седница во Собранието ќе гласаат против зголемувањето на таксата за Јавниот медиумски сервис-РТС од 299 на 349 динари (3 евра), бидејќи сметаат дека тоа е „пропаганден билтен на власта на Александар Вучиќ“, јави дописникот на МИА од Белград.
Пратениците на Народното движење на Србија, Зелено левиот фронт, Партијата за слобода и правда (СПП), Еколошкото востание, коалицијата НАДА и движењето Ние-сила на народот-Бранимир Несторовиќ изражаа низа приговори за известувањето на Радио- телевизија на Србија (РТС) во своите информативни програми, „цензура на секое критичко мислење“, како и „промовирање на коцкањето во рекламите“.
Далибор Јекиќ од ССП рече дека „РТС треба да го смени логото во Српската напредна странка-СНС, бидејќи е билтен на таа партија“, Бранко Лукиќ од движењето на Несторовиќ оцени дека РТС не го заслужува името на јавен сервис, додека пратеникот Бранко Лукиќ, од „Ние сила на народот-Бранимир Несторовиќ“, најави дека ќе гласа против зголемувањето на претплатата на РТС бидејќи смета дека јавниот сервис треба да обезбеди пристап на сите политички актери.
Министерот за труд, вработување, бранители и социјала Немања Старовиќ во дебатата кажа дека за него е разбирливо опозицијата да биде против предлогот што подразбира зголемување на претплатата дури и кога станува збор за минимално зголемување за 50 динари, но дека потребно е да се обезбеди стабилен начин на финансирање на РТС.
Тој додаде дека ако некој има причина да биде незадоволен од уредувањето на РТС, тоа се членовите на Владата како и неговите колеги кои се пратеници на владејачката коалиција СНС-СПС, но смета и дека не е добро да се изнесуваат неточни податоци.
-Мора да знаеме дека РТС и РТВ ја одредуваат својата уредувачка политика на сосема независен начин и дека на тоа не можеме да влијаеме ниту ние од владата, ниту од владејачката коалиција, како ни опозицијата, рече Старовиќ.