Богота, 7 мај (МИА) - Колумбиските власти денеска го протераа поранешниот косовски премиер Агим Чеку, за кој српските власти имаат објавено потерница преку Интерпол заради воени злосторства во Косово за време на судирите во 1999 година.
Административниот Оддел за безбедност - разузнавачка служба на Колумбија (ДАС), одлучи да го протера Чеку, но не даде детали за неговата дестинација.
ДАС соопшти дека не може да примени мерки за приведување странски државјани обвинети за дела направени пред 2005 година.
Чеку допатувал во Колумбија на 3 мај за учество на семинар за демобилизација и разоружување.
Министерот за внатрешни работи на Србија Ивица Дачиќ вчера соопшти дека Интерпол потврдил оти Чеку се наоѓа во Колумбија, но оти државата не може да примени мерка задржување. Тој појасни дека според колумбискиот закон, мерките за приведување против странски државјани не се можни за кривични дела извршени пред 2005 година.