Берлин, 17 март (МИА) - Сегашните Грци не се ништо друго освен мешавина од племиња, кои периодично преминувале во земјата како агресори или како бегалци и емигранти, пишува денеска во својот напис германскиот весник „Франкфуртер алгемајне цајтунг“.
- Грците не потекнуваат од Грци, смета германскиот новинар Андреас Килб.
Според атинскиот весник „Та неа“, уредникот на културната рубрика на германскиот весник „без многу зборови“ тврдел дека денешните Грци не се ништо друго освен она што го оставиле по себе Словените во 600-та година по н.е., француските крстоносци, Бугарите, Србите, Каталонците, Османлиите и албанските племиња.
Еден на секои четири од денешните Грци потекнува од бегалци, уште толку од нив имаат словенски или албански корени, но сите се единствени пред заедничкиот непријател, пишува „Франкфуртер алгемајне цајтунг“.
Написот е објавен откако неодамна германскиот весник „Билд“ напиша во своето издание со големи букви „Продадете ги островите, банкротирани Грци! Продадете го и Акропол“.