Во Бразил уапсени тројца Хрвати, Бугарин, Црногорец и Македонец поради шверц на кокаин

Загреб, 16 јули 2010 (МИА) - Тројца Хрвати и по еден Бугарин, Црногорец и Македонец се уапсени во Бразил во полициската акција „медуза“ поради шверц на 62 килограма кокаин со најголема чистота. 

По четиримесечно следење, полицијата ги упасила Дамир Шимиќ, Слободан Његиќ и Ален Чичериќ, пишува весникот „Слободна Далмација“. Покрај нив уапсени се и Црногорецот Никша Илиќ, Драган Рангелов од Бугарија и Миодраг Воичиќ, натурализиран Бразилец, со потекло од Македонија.

Во акцијата спроведена во најјужната држава Рио Гранде до Сул и соседната Санта Катарини, запленети се 59 палети наводни лекови. Вредноста на запленетата дрога се проценува на повеќе од 1,2 милиони евра, а покрај неа запленети се и еден брод и три џипа, со кои дрогата е пренесувана во пристаништата Флорианополис, Имбитуба, Итајаи и Навегантес за дистрибуција кон Европа.

Бразилската полиција како главен организатор го смета Његиќ, а координатор на операцијата бил Воичиќ, кој живее во Бразил подолго од 20 години, каде се оженил, има деца, а отворил и ресторан и такси компанија. Воичиќ уште во 2008 година бил предмет на истрага на бразилските власти.

Полицијата за шверцот на кокаин со бродови во Европа дознала од анонимна пријава, по што е организирано следење и прислушкување на сите шест учесници во криумчарењето.