Амбасадата на Србија во Будимпешта соопштила дека монструмот кого унгарската полиција го уапси, заедно со уште двајца помошници, осомничени дека закопувале живи луѓе не е Србин. Повикувајќи се на сопствени, неименувани, извори весникот “Блиц“ пишува дека станува збор за македонски државјанин.
“Од унгарската полиција добивме информација дека осомничениот не е наш државјанин, ниту е Србин, како и дека амбасадата на Македонија, чиј државјанин е, е известена за случајот и за неговото апсење“, објаснува соговорникот на “Блиц“ од српското министерство за надворешни работи.
Монструмот е уапсен под сомение дека, заедно со уште двајца помошници, закопал неколку живи луѓе во шумата Чепел, во јужниот дел на Будимпешта, а истражните органи на означено место откриле три свежи лешови и уште три човечки черепи, закопани пред неколку месеци. Како што пренесуваат медиумите, злосторникот го признал делото.
Истрагата за злосторството ја презеде Националното истражно биро - ННИ, унгарска варијанта на американската Федерално биро за истраги - ФБИ.
Порптаролот на ННИ, Ласло Барт соопштил дека е покрената истрага, но одбил да каже за колку смртни случаи станува збор. Според сознанијата на “Маџар хирлап“ во тек е претрагата по шумата каде се случило кривичното дело и дека е многу веројатно да се пронајдат уште лешови. Новинар на Унгарската национална телевизија на лице место видел четири леша, а неофицијално се споменуваат и пронајдени остатоци од човечко тело од пред повеќе месеци.