Њујорк, 24 ноември 2011 (МИА) - Тактиката на стапот и морковот, која ја применува ЕУ можеби повеќе не е толку примамлива за Србија, која би можела своите тежнеења кон членството во Унијата да ги стави на мраз или дури и целосно да ги отфрли бидејќи не сака да се одвои од Косово, пишува „Волстрит џурнал“.
ЕУ, која на 9 декември треба да одлучи дали ќе пристапи во преговори за членство со Србија, минатиот месец соопшти дека тензичните односи со Косово мораат да се подобрат.
Во текстот се наведува дека Унијата, иако засега не ја присилува Србија да ја признае независноста на Косово, веројатно порано или подоцна ќе инсистира на тоа Белград да преземе таков чекор, бидејќи не сака политички конфликт покрај сопствените финансиски проблеми.
Србија се надева дека ќе се реши косовскиот проблем без да мора да ја прифати независноста на Косово, но ЕУ не е толку цврсто убедена дека тоа е можно.
Имајќи го предвид тоа дека откажувањето од Косово е тешко прифатливо за повеќето Срби, кои го сметаат за своја културна колевка, дел од српскиот политички врв размислува за откажување од тежнеењето кон ЕУ.
Националистичката реторика повторно се распламтува пред изборите предвидени за мај следната година, објави весникот, пренесувајќи ја неодамнешната изјава на српскиот министер за внатрешни работи Ивица Дачиќ дека „ако цената е Србија да се откаже од Косово за да добие членство во Унијата, тогаш тоа не треба никогаш да се прифати бидејќи постојат национални и државни интереси, а Србија може да опстане и без ЕУ“.