Мадрид, 14 мај 2010 (МИА) - Францускиот претседател Никола Саркози се закани дека Франција ќе ја напушти еврозоната, за да ја принуди Германија да донесе спасувачки план за Грција, тврди шпанскиот премиер Хосе Луис Родригес Сапатеро.
Според весникот „Паис“, кој е близок до владејачките социјалисти, Сапатеро ова го изјавил во средата на средба со лидери од неговата Шпанска социјалистичка работничка партија.
Минатиот петок Саркози побарал „ангажман од сите земји-членки за да и помогнат на Грција, секоја според своите можности, во спротивно Франција ќе ја преразгледа својата положба во еврозоната“.
Шефовите на држави и влади од еврозоната се собраа минатиот петок во Брисел за да го одобрат планот за помош на Грција во вредност од 110 милијарди евра во форма на кредити од ЕУ и ММФ во следните три години. Решението за спасување на Грција од банкрот не беше донесено лесно, најмногу поради несогласувањето на Германија.
- Саркози удри со тупаница по масата и се закани дека ќе се откаже од еврото, извртувајќи ја на овој начин раката на германската канцеларка Ангела Меркел, истакна еден од високите функционери на Шпанска социјалистичка работничка партија, цитирајќи ги зборовите на Сапатеро.