Руските државјани од Виена заминаа за Москва

Виена, 9 јули 2010 (МИА) - Државјаните на Русија, кои во САД беа уапсени под обвинение дека се руски шпиони, денеска со руски авион од Виена полетаа за Русија, изјави неименуван извор од руската разузнавачка служба.

Заменик-началникот на прес бирото на НАдворешно разузнавачката служба, Сергеј Гусков одби да ја коментира размената на руските и американските агенти.

Претходно, во Виена слетаа два авиона, американски и руски, во кои се наоѓаат депортираните од САД десет руски агенти и четворицата западни шпиони ослободени во Русија. 

Во согласност со постигнатиот договор меѓу двете земји, во австрискиот главен град  се изврши размена на десетте граѓани, протерани од САД, за четирите лица, претходно осудени во Русија.

Според дел од западните медиуми, авионот на „Вижн ерлајнс“ слетал во Виена во 9.15 часот по Гринич и запрел до авион, означен со руско знаме. Меѓу двата авиони имало подвижни скали, но не се гледале патници.

Некои од руските агенти беа покажани синоќа како се качуваат на американскиот авион на аеродромот „Ла Гвардија“ во Њујорк.

Министерствата за надворешни и за внатрешни работи на Австрија ниту ја потврдија ниту ја демантираа информацијата.