МВР билтен: Кривична пријава против сопственикот на МИК „Свети Николе“

Скопје, 14 февруари (МИА) - Струмичката полиција до Основното јавно обвинителство Струмица поднесе кривична пријава против В.Ѓ. (50) од Скопје, сопственик на МИК „Свети Николе“ и претседател на одборот на директори на АД „Малопродажба со угостителство“ –Струмица, и Т.П. (55), претседател на собранието на акционери на АД „Малопродажба со угостителствo“ –Струмица, поради постоење основано сомнение дека сториле кривично дело „злоупотреба на службена положба и овластувања“.

Двајцата пријавени во текот на јануари минатата година, соопшти денеска МВР, искористувајќи ги своите службени положби и овластувања во АД „Малопродажба со угостителство“ – Струмица, спротивно на Законот за трговски друштва, на 19 јануари годинава донеле одлука за оттуѓување недвижен имот на АД „Малопродажба со угостителство“ – Струмица со мнозинство од 57,12 отсто од гласовите од вкупниот број акции со право на глас. Иако имотот, според книговодствената вредност, надминувал 50 проценти од вредноста на целокупниот имот на акционерското друштво, тие наместо потребното двотретинско мнозинство за носење таква одлука за оттуѓување на имотот, тоа го сториле со обезбедување просто мнозинство.

Првопријавениот како мнозински акционер во АД „Малопродажба со угостителство“ –Струмица поседувал 55,15 отсто од акциите на друштвото. Покрај ова, тој преку фирмата „СИИВА“ ДОО Скопје, во која бил извршен директор со неограничени овластувања, се јавува и како заинтересирана страна по објавениот оглас за продажба на недвижниот имот на АД „Малопродажба со угостителство“  – Струмица.

Во соопштението се подвлекува дека на овој начин, преку донесување незаконска одлука и спроведување фиктивен-договорен оглас за продажба на недвижен имот, пријавените го оштетиле акционерското друштво во вредност од 19.524.978 денари.