Штипјанецот Зоран Милев постави нов светски рекорд во радиотелеграфија

Скопје, 12 јуни (МИА) - Штипјанецот Зоран Милев на Светското првенство во радиотелеграфија што се одржа на 24 и 25 мај  во градот Сус во Тунис постави нов рекорд во категоријата 3.5 мегахерци, мала сила, со што го собори веќе поставениот рекорд стар 12 години.

Милев кој од 2002 година работеше во Турција беше азиски и светски рекордер во дисциплината 3.5 мегахерци голема сила. Тој втора година по ред е победник на отвореното првенство на Шпанија во радио телепринтерство.  Во 2007 година  беше прв во светот во категорија седум мегахерци, а годинава во категорија 3.5 мегахерци.

- Огромно е задоволството и искуството стекнато од африканскиот континент. Го соборив светскиот рекорд стар 12 години кој го држеше шпански радиоаматер. Освоив  1.094.200 поени што е  три пати повеќе од стариот рекорд. Сега со задоволство можам да кажам дека радиоаматер од Македонија држи еден светски, азиски и африкански рекорд и со огромен успех ја претставував Македонија во Тунис, изјави Милев.