Скопје, 2 август (МИА) - Претседателот на Република Македонија Бранко Црвенковски денеска потпиша решение за помилување на градоначалникот на општина Струмица Зоран Заев и за неговите петмина соработници, соопшти неговиот Кабинет.
Во соопштението се вели дека претседателот Црвенковски по извршените консултации со претседателите на СДСМ и ДПА, Радмила Шеќеринска и Мендух Тачи, бил информиран дека двете политички партии го прифаќаат неговиот предлог за надминување на политичката криза во земјава и оти се враќаат во Собранието, во ЗЕЛС и воспоставуваат нормална соработка со сите институции во државата. Согласно тоа, како што се наведува во соопштението, претседателот Црвенковски го потпишал решението за помилување на градоначалникот на општина Струмица Зоран Заев и неговите петмина соработници.
Од Кабинетот на претседателот Црвенковски информираат и дека тој согласно јавно промовираниот план донел и одлука за непотпишување на указите за прогласување на Законот за употреба на јазиците, Законот за лобирање, Законот за изменување и дополнување на Законот за работните односи, Законот за изменување и дополнување на Законот за експропријација, Законот за изменување и дополнување на Законот за адвокатура и Законот за изменување и дополнување на Законот за енергетика.
Писменото известување за оваа одлука претседателот Црвенковски ќе го упати до претседателот на Собранието в понеделник, на 4 август.
Вчерашната седница и повторното изгласување на групата закони, за претседателот Црвенковски претставува грубо кршење на уставните и законските норми, бидејќи, како што се вели со соопштението, таквата постапка единствено е можна по писменото известување од страна на претседателот на државата до претседателот на Собранието, што овој пат не било случај.
- Оттука ваквите одлуки на Собранието се невалидни и не произведуваат правно дејство, се вели во соопштението и се додава дека претседателот Црвенковски апелира до премиерот и лидер на парламентарното мнозинство Никола Груевски да ги согледа, како што се вели, сите штетни последици од спроведување на ваквите политики.