Самостојна изложба на графичарот Ладислав Цветковски

Скопје, 11 март (МИА) - Во Музејот на Град Скопје вечер ќе биде отворена самостојна изложба на македонскиот графичар Ладислав Цветковски, кој на публиката ќе и се претстави со својот последен проект „Пиксказни“, работен во последните две години.

Проектот го сочинуваат пет дела изработени во техниката дигитален печат на платно. Насловени се „Круг“, „Глобализација во сино“, „Чет“, „Заслепено, задушено, замолчено“ и „Далечински управувач“.

 - Со овој проект авторот сака да ја престори првата сала на Музејот на Град Скопје во метафора за скопски двор во кој ја сместил својата збирка „Пиксказни“, соопшти Музејот на Град Скопје.

Цветковски (1965) од 2007 е доцент на Факултетот за ликовни уметности во Скопје. Во текот на целото работно искуство интензивно ги истражува технолошките и изразните можности на електронските медиуми, а во последно време е фокусиран на дигиталната технологија која ја користи како свое основно изразно средство во ликовната уметност.