Расте бројот на наркозависници во Струмица

Струмица, 1 јуни (МИА) - Официјалната бројка на регистрирани зависници во Струмичко е 460 или пет отсто од вкупниот број зависници во Македонија.

Според НВО „Избор“, статистичките податоци зборуваат дека бројката на наркозависници постојано се зголемува.

- Најголем број наркозависници, а нив ги има речиси подеднакво во сите етнички, верски и социјални средини, се млади лица од 16 до 18 години, а според половата припадност машката популација е поподлежна на овој опасен порок, вели Сократ Манчев, претседател на НВО „Избор“, која се занимава со превенција, едукација и рехабилитација на интервенски и други корисници на дрога. Манчев потенцира дека најмногу од се загрижува фактот што старосната граница на оние кои посегнуваат по опојни средства постојано се намалува, така што како уживатели на дроги веќе се регистрирани и деца од 12 години. Во употреба се сите видови познати опијати, подвлекува тој, а најмногу марихуаната и хероинот.

Од „Избор“ најавуваат дека оваа есен во близината на Струмица планира да отвори Центар за реинтеграција врз принципот на тераписка заедница или комуна.