Промоција на културата и традицијата на живеење на Египќаните во Македонија

Скопје, 24 јуни (МИА) - Поголемо прифаќање на заедницата на Египќаните од страна на институциите и остварување на нивните права и обврски, предвидени со меѓународни принципи и малцински права, побара здружението на Египќани на денешната прес-конференција.

Претставникот на здружението Амон Ра од Битола, Нешат Аземовски ја претстави програмата која ќе се одржи од 24 јуни до 1 јули годинава, по повод Денови на Египќаните во Македонија.

- Проектот кој е подржан од Европската унија содржи различни настани преку кои ќе се презентира традицијата, културата и активностите на заедницата на Египќаните во Македонија, во насока на поголема презентација пред институциите на системот и пошироката јавност. Сето тоа ќе биде во контекст на слоганот „Еднакви можности за подобра иднина“, рече Аземовски.

Централната манифестација ќе се одржи вечерва во Мала станица. 

Во рамките на проектот ќе биде промовиран и филмот „Жими ковачот“ во продукција на здружението на Египќаните од Битола, Амон Ра и Биосвера.