Видео-приказната за “Охрид-град на светлината”, од денеска се емитува на најголемата светска ТВ- мрежа, CNN. Шеесет секундниот промотивен спот е снимен на локациите Плаошник, село Трпејца, Свети Наум, Света Перивлепта, стариот град, куќата на Робевци, а во него учествуваат Каролина Гочева, Мето Jовановски и Николина Кујача. Кореографијата е на Рисима Рисимкин. Ова е трет видео материјал кој спаѓа во рамките на проектот на Владата на Р. Македонија „Македонија вечна“.
- Приказната е за впечатливиот град со историја, за балканската лулка на уметноста, религијата и културата, за градот на бисерите и добрата храна, раскажана е низ визуелната игра на сенки и светлина – изјави сценаристот и режисерот на спотот, Душан Дракалски, креативен директор во агенцијата “New Moment New Ideas Company“, - Наменет за странска промоција на Охрид, овој спот го прикажува минатото, но и современото лице на градот, како модерен туристички центар што нуди добра забава за потенцијалните странски туристи - потенцираше Дракалски.
Снимени се две верзии од спотот, едната е со музиката на Фолтин, а втората е на композиторот Дуке Бојаџиев. Според информациите овој промотивен видео материјал чини 80.000 евра.