Грција има “национална црвена линија, која е позната и јасна“, во однос на спорот за името со Скопје. Ова го изјавил портпаролот на грчката влада, Јоргос Петалотис, по повод развојот на настаните околу македонското прашање, пишува во своето денешно издание грчкиот весник “Катимерини“, пренесува Нетпрес.
По изјавите на еврокомесарот за проширување, Оли Рен, според кого Македонија треба да добие датум за отпочнување на преговори независно од тоа дали спорот со Атина за името е решен или не, властите во Скопје тоа што се случи го претставија како историски дипломатски успех, наведува весникот.
“Тоа, што можам со сигурност да го кажам е, дека е јасно оти Македонија нема да добие датум за отпочнување на преговори за членство во ЕУ, ако не се реши спорот за името“, изјавил Петалотис.
Во министерството за надворешни работи на Грција сметаат дека извештајот за напредокот, презентиран од Рен, би бил уште полош, ако власта во Грција и грчкиот комесар Ставрос Димас, не успеаја во последен момент да ги вметнат забелешките во однос на спорот за името, се вели понатака во текстот. Според весникот, идеална варијанта за грчката страна би било до декември да се најде решение во спорот, за да не се одлага давањето на датум за отпочнување на преговори меѓу Македонија и ЕУ.