Скопје, 10 ноември (МИА) - Училиштата не се затвораат бидејќи се уште не е прогласена епидемија на новиот грип. Засега нема препорака и за носење заштитни маски, но се одложуваат сите екскурзии, изјави денеска министерот за образование Никола Тодоров.
- Според препораките на Светската здравствена организација, не треба да се преземаат чекори за затворање на училиштата, додека таква потреба не се востанови. Прво треба да се прогласи епидемија од новиот грип од типот А (Х1Н1), а потоа да се побара од основачот на училиштето-локалната самоуправа до Министерството за образование согласност за затворање на училиштето. Засега нема прогласено епидемија, никој не побарал од Министерството затворање на некое училиште и соодветно на тоа нема дадено согласност, изјави Тодоров при денешната посета на Ректоратот на Универзитетот „Св. Кирил и Методиј“.
Прашан дали ќе препорача носење заштитни маски на училиште, министерот за образование рече дека препорака за тоа дава Министерството за здравство.
- Ние во Министерството за образование, во ваков случај не сме компетентни да предлагаме мерки, ние само можеме да ги спроведуваме мерките кои се предложени од компетентни луѓе - доктори и епидемиолози, додаде Тодоров.
На прашањето зошто училиштата каде што има заболени ученици од новиот грип од типот А (Х1Н1) досега не се дезинфицирани, министерот одговори дека е информиран од Министерството за здравство оти секаде каде што ќе бидат потврдени случаи на свински грип, епидемиолозите ќе вршат дезинфекција на училиштето.
Состојбата со ширењето на новиот грип, како што посочи, активно ја следи Министерството за здравство, кое формирало кризен штаб што 24 часа ќе ја следи состојбата и ќе презема соодветни мерки.
Ректорот на Универзитетот „Св.Кирил и Методиј“ - Скопје, Велимир Стојковски прашан дали презема нешто ректорската управа во врска со зачестените појави на свински грип, изјави дека ректорската управа, во кои се членови сите декани, презема соодветни мерки, онака како што препорачува Министерството за здравство.
- Засилена е хигиената, засилени се сите контроли во тоалетите, но тоа е надлежност на факултетите и тие се однесуваат онака како што треба во оваа ситуација, рече Стојковски.
На Универзитетот, додаде тој, многу е комплицирано да се евидентира дали има отсуство од настава, за разлика од основното и средното образование, и дали за тоа причина е новиот грип.