Скопје, 9 ноември 2010 (МИА) - Комисијата за верификација на факти на денешната затворена седница одлучила дека не постојат оригинални документи за досието „Ибар“ и оти фотокопиите што се доставени не се релевантни. Досието „Ибар“ беше посочено како наводно досие на лидерот на ДУИ Али Ахмети.
- Фотокопиите не може да бидат релевантни за Комисијата за верификација на факти. По добиените сознанија за извршената проверка, по споредувањето со други досиеја формирани во тоа време од истите служби може да се констатира дека истите не се релевантни за Комисијата да може да постапува, изјави претседателот на Комисијата Томе Аџиев.
И ова досие како и претходните, како што рече Аџиев, не ги исполнува стандардите на едно досие.
До Комисијата стигнале одговорите на барањето за проверка дали такво досие постои во архивите на безбедносните служби и Државниот архив, и сите биле негативни. Ваква постапка била спроведена и за претходните досиеја „Мама“ и „Вујко“, кои беа прогласени за неверодостојни. Фотокопијата што до Комисијата ја достави жител на Порој, за лустраторите е нерелеватна за продолжување на постапката.