Скопје, 1 март 2011 (МИА) - Претседателката на Државната пописна комисија Весна Јаневска денеска изјави дека се уште нема најави од Владата за евентуално одложување на претстојниот априлски попис. Таа ги повика членовите на Комисијата од албанската и турската етничка заедница да се вратат на седниците на ова пописно тело.
- Нема информација од Владата за одложување на пописот, изјави претседателката на Државната пописна комисија, за МИА.
Доколку се пристапи кон евентуално одложување на пописот што во Македонија треба да се одржи од 1 до 15 април годинава, Владата треба да донесе одлука за измени на Законот за попис, да ја извести Државната пописна комисија за измените и истите да ги достави до Собранието, кое треба да ги изгласа.
Јаневска ги потврди информациите дека на конкурсот за попишувачи се јавиле помал број кандидати од албанската, турската, но и од други етнички заедници.
- Ги повикувам членовите на Комисијата Албанци и Турци да се вратат на седниците на пописната комисија за да можеме заедно да го надминеме проблемот со малиот број пријавени попишувачи на конкурсот за претстојниот попис, изјави Јаневска.
Членовите етнички Албанци и Турци на Државната пописна комисија пред некое време ја напуштија работата на комисијата поради несогласувања во врска со одлуката за бројот на попишувачите - припадници на етничките заедници на локално ниво.