Конкурс за државната награда за новинарство и публицистика од 1-ви до 30 октомври

Скопје, 29 септември 2011 (МИА) - Одборот за доделување на државната награда „Мито Хаџи Василев - Јасмин“ задутре ќе распише конкурс за доделување на годинашното високо признание за остварувања во областа на публицистиката и новинарство.

Конкурсот ќе биде отворен на 1 октомври и ќе трае до 30 октомври. Иницијативите и предлозите (трудови, книги, публикации...) треба да бидат доставени до Министерството за култура на Република Македонија - Одбор за доделување на државната награда „Мито Хаџи Василев- Јасмин“, ул.„Ѓуро Ѓаковиќ“ бр. 61 Скопје.

Како што соопшти Министерството за култура, подносителите на иницијативата за доделување на наградата треба подробно да ја образложат. Во текстот треба да се содржани  прецизни биографски податоци, точна адреса на живеење, податоци за остварените резултати во областа во која што е постигнато остварувањето и други податоци што се смета дека ќе придонесат во оценувањето. Текстот на иницијативата да се достави во 15 примероци, а трудовите (книги, публикации...) се третираат како прилози и треба да се достават најмалку во два  примерока.

Во една година може да се доделат најмногу две награди „Мито Хаџи Василев - Јасмин“. Наградата е парична и во износ од пет просечни месечни плати во Република Македонија.

Оваа државна награда се врачува секоја година во Собранието на РМ на 21 декември, денот кога е роден Хаџи Василев - Јасмин, политичар и прво перо на македонското новинарство  и публицистика.