Велес, 15 ноември 2011 (МИА) - СВР Велес до надлежното обвинителство поднесе кривична пријава против 39-годишниот велешанец Н.М. на привремена работа во Белгија, поради основано сомнение дека сторил кривично дело „полов напад врз дете‘‘.
Според Анита Стојковска портпарол на СВР Велес, пријавениот на 6 ноември годинава дошол во Македонија. За време на неговиот престој во земјава, во два наврата сторил кривично дело „полов напад врз дете‘‘. Тој кажувајќи и дека многу ја сака и ветувајќи и дека откако ќе наполни 17 години ќе ја носи во Белгија, успеал да наговори тринаесетгодишно девојче да имаат сексуални односи.
Откако мајката на девојчето дознала, веднаш пријавила во СВР Велес, по што пријавениот на 13 ноември годинава е приведен во Полициската станица Велес, а по целосното документирање на делото, во текот на вчерашниот ден до надлежното обвинителство процесуирана е кривична пријава. По наредба на истражен судија на пријавениот му е одредена мерка притвор во траење од 30 дена, по што е спроведен во истражен затвор Скопје.