Почесен конзул на Романија во Куманово ќе биде доктор Алириза Османи

Куманово, 28 декември 2011 (МИА) - Амбасадорот на Романија во Македонија, Јустинијан Фокша при денешната посета на општина Куманово, најави дека почесен конзул на оваа држава во градот ќе биде доктор Алириза Османи.

- Се надевам дека со поддршка на локалната администрација и по решавањето на технички прашања ќе го промовираме почесниот конзул, изјави амбасадорот по средбата со градоначалникот на Куманово Зоран Дамјановски.

Конзулатот ќе биде насочен кон активирање на трговските, економските, културните и научните врски на општините од потегот Гостивар до Крива Паланка.

Амбасадорот и градоначалникот по средбата изјавија дека, покрај промоцијата на конзулот, разговарале и за продлабочување на постоечките односи во сферата на образованието, културата и економијата.

- Училиштата од Куманово се партнери со училишта од Романија и реализираат одлични заеднички проекти, со цел подобрување на квалитетот на образованието. Се надевам дека на следната средба со амбасадорот ќе разговараме и за конкретни проекти од областа на економијата, изјави градоначалникот Дамјановски.