Со концерт на камерното трио „Виво“ НУ Центар за култура во Куманово го одбележа патронатот

Куманово, 7 ноември 2012 (МИА) - Со концерт на камерното трио „Виво“, Националната установа Центар за култура „Трајко Прокопиев“, синоќа го одбележа патронатот на установата.

Пред кумановци настапија Милена Гиевска на виолина, Атанас Петров на фагот и Александар Христовски Роропулос на кларинет.

На програмата беа изведени дела од Трајко Прокопиев, Драган Шуплевски, Моцарт, Бетовен, Девиен...

- Дел од најзначајните манифестации кои се реализираат во центарот се меѓународните фестивали „Денови на комедија“, „Мак-денс“, „Скици“, „Кумановски графичари и скулптури“, како и традиционалните „Маскенбал“, „Шарено јајце“, „Меѓународна изложба на фотографии“ ...се само дел од програмата што ја нуди и организира Центарот во текот на годините на кумановци, вели стручниот соработник Роберт Цветковски.

Центарот за култура започна со работа како Дом на културата во 1981 година. Во наредните години се трансформира како Центар за култура, а во 2004 година станува правен субјект во кој е опфатен и театарот. Центарот за култура ќе продолжи во насока на освојување нови европски стандарди и ќе се труди дел од програмите и претставите од својата продукција да ги презентира и во странство.