Гевгелија и хрватскиот град Пазин потпишаа меморандум за збратимување

Гевгелија, 8 ноември 2013 (МИА) - Градоначалниците на Гевгелија и градот Пазин од Хрватска, Иван Франгов и Ренато Крулчиќ, потпишаа Меморандум за збратимување со кој се официјализира соработката меѓу двете општини во сите сфери на работење.

По тој повод, градоначалникот на Пазин истакна дека неговата општина со своите 9.000 жители е најмала во Хрватска, но и со најмала невработеност од само 7 отсто и додаде дека заедничка заложба ќе биде добрите искуства од двете општини да се споделат за доброто на граѓаните на Гевгелија и Пазин.

Гегелискиот градоначалник Франгов изјави дека Меморандумот создава можности за унапредување на соработката,пред се на стопански и културен план,за што ќе биде изготвена посебна програма за поврзување на бизнис заедниците и за културна размена на двете општини.