Се стравува дека најмалку шест лица го загубиле животот, а девет се повредени во несреќа со туристичка подморница што утрината потона во Црвеното Море во близина на египетското летувалиште Хургада, јавува Би-Би-Си, повикувајќи се на локални извори. Меѓу повредените четири лица се во критична состојба, а 29 патници се спасени и пренесени во блиските болници. Како што потврдија од Руската амбасада во Каиро, сите туристи на подморницата биле Руси.
Хургада е популарна туристичка дестинација позната по плажите и коралните гребени.
Се претпоставува дека во моментот на несреќата во подморницата имало околу 40 туристи. Според информациите на дописниците на Би-Би-Си од Каиро, подморницата била наречена Синдбад и потонала во близина на пристаништето Хургада.
Подморницата Синдбад со години превезува туристи да го истражуваат подводниот свет на Црвеното Море, а според веб-страницата на компанијата што управува со неа, таа е една од само 14-те вистински туристички подморници во светот. Таа може да прими најмногу 44 патници и се спушта на длабочина од 25 метри, нудејќи поглед на околу 500 метри корален гребен.