Жените кои во текот на ноќта долго време спијат се изложени на помал ризик да се здебелат во средни години, покажале резултатите од истражувањето спроведено на американскиот Универзитет Кејс Вестерн Ризерв во Кливленд.
Причината за таквата состојба се уште не е позната. Некои експерти сметаат дека недоволното спиење предизвикува промени во хормоните кои се одговорни за контрола на апетитот и метаболизмот, а претходно често пати се сметало дека жените кои помалку спијат повеќе јадат, или дека поради уморот помалку се физички активни.
Испитувајќи 68.000 жени во текот на 16 години, истражувачите од Кливленд утврдиле дека тие кои просечно спијат пет часа во текот на ноќта, во однос на испитаничките кои спијат седум или повеќе часови, имале за една третина поголеми шанси во текот на студијата значително да се здебелат (за 16 и повеќе килограми) и за 15 отсто поголеми шанси да стапат во категоријата дебели.
Истражувањето во Кливленд покажало дека наклонетоста кон здебелување кај жените кои недоволно спијат нема врска со поголемото внесување калории. Напротив, утврдено е дека тие кои помалку спијат, помалку и јадат. Исто така исклучена е и недоволната физичка активност како причина за вишок килограми.