Српската Агенција за електронски медиуми со препорака да не се емитуваат програми со јасновидци, гатачи и астролози

Белград, 21 март (МИА) - Српската Агенција за електронски медиуми побара од телевизиите и од радијата да ги тргнат програмите во кои учествуваат јасновидци и астролози, заканувајќи се дека може да им ги укине лиценците на оние медиуми кои емитуваат такви програми.

Препораката има необврзувачки карактер, но Агенцијата најави дека ќе го преиспита прашањето при издавањето или продолжувањето на лиценците за медиумите.

Програмите кои директно се емитуваат за пророштва и хороскопи се многу популарни во Србија, но ретко се предупредува дека импулсите на телефонските броеви за врска, за оние кои сакаат да ја дознаат својата иднина се доста скапи.

 - Таквите програми не можат да бидат оценети како законска дејност се додека вклучуваат финансиска злоупотреба која е очигледна, посочи Агенцијата за електронски медиуми, појаснувајќи дека цената за минута телефонски разговор во таква емисија во Србија е најмалку 90 евроценти.