Осветена црквата „Свети Илија“ во охридското село Лескоец

Охрид, 29 јули (МИА) - Со света божествена литургија со која чиноначалствуваа митрополитите дебарско-кичевски Тимотеј и брегалничкиот Иларион, денеска во село Лескоец кај Охрид беше осветена црквата „Свети Пророк Илија“.

Црквата почна да се гради пред 11 години, а иницијатор овде да се подигне храмот на Свети Илија е жителот на селото Олга Пацеска.

- Уште тогаш ми се сони дека на ова место треба да изградам црква посветена на Свети Илија и оттогаш, со божја помош и средства на народот и други донатори успевавме да ја изградиме. Ова е за мене среќен ден, рече Пацеска.

Изграбата на црквата чинеше околу половина милион евра.

- Изградбата на црквата, а се градат и многу други, покажува дека верата кон Бога кај македонскиот народ е многу силна и дека меѓу македонскиот православен народ силно живее духот на Свети Климент и Свети Наум, истакна митрополитот дебарско-кичевски, г. Тимотеј.