Хронологија на размената на шпиони меѓу Русија и САД

Москва, 9 јули 2010 (МИА) - Размената на шпиони е обична пракса, но по правило не се објавува во јавност, соопштија западните медиуми по повод денешната размена на на уапсени лица по обвинение за шпионажа меѓу Русија и САД.

Познати се само неколку вакви случаи.

На пример на 10 февруари 1962 година советскиот разузнавач Вилјам Фишер (познат како Рудолф Абел), кој е уапсен во 1957 година во Њујорк, е разменет за американскиот пилот Франсис Пауерс, чиј разузнавачки авион ЈУ-2 бил урнат над Урал на 1 мај 1960 година. Размената е извршена на мостот Глиникер-Бруке на границата на Западен Берлин и Источна Германија, кој подоцна станал познат како „Мостот на шпионите“.

На 11 октомври 1963 година уапсените разузнавачи во Советскиот сојуз Марвин Макинен и Валтер Чишек се разменети за советските агенти Иван и Александар Егорови.

На 18 декември 1976 година на аеродромот во Цирих разменет е дисидентот Владимир Буковски за генералниот секретар на чилеанската комунистичка партија Луис Корвалан.

На 27 април 1979 година советските власти ослободиле од затвор и ги испратиле во САД петмина дисиденти - Едвард Кузнецов, Марк Димшиц, Александар Гинсбург, Валентин Мороз и Георгиј Винс во замена за двајцата разузнавачи Валдик Енгер и Рудолф Чернаев.

На 12 јуни 1985 година на мостот Глиникер-Бруке е извршена размена на 23 агенти на ЦИА, уапсени во различни држави од Источниот Блок, за четворица агенти на КГБ.

На 11 февруари 1986 година на истиот мост се разменети девет лица. СССР го ослободи дисидентот Натан Шарански и тројца наводни агенти на западни разузнавачки служби во замена за уапсените во Њујорк брачната двојка Карл и Хана Кехер (соработници на чехословачкото разузнавање), советскиот разузнувач Евгениј Землаков, полскиот државјанин Јежи Качмарек и Германецот Детлеф Шарфенорт.

Меѓу 28 септември и 5 октомври 1086 година, во замена за уапсениот во САД службеник во постојаното претставништво на СССР во ОН, Генадиј Захаров, Американците ги добија шефот на дописничката редакција на списанието „Ју Ес њуз ворлд рипорт“ во Москва Николас Данилоф, уапсен под сомнение за шпионажа, како и основачот на Московската хелсиншка група Јуриј Орлов.