„Гардијан“: Ирачаните не се задоволни од повлекувањето на aмериканските војници

Лондон, 31 август 2010 (МИА) - Ирачката јавност и луѓето во Ирак не се задоволни со решението на Вашингтон за повлекување на американските војници од борбените операции, како и со целосното повлекување од нивната земја, пишува лондонски „Гардијан“.

Како што јави дописникот на МИА од Лондон, весникот тврди дека Ирачаните се загрижени за ситуацијата што ќе настане во Ирак по заминувањето на војската на САД, затоа што и по неколку месеци од изборите во Багдад се уште нема Влада, а бројот на жртвите од терористичкото насилство во изминатите два месеци е најголемо во последните две години,.

Бројот на американските војници во Ирак е намален за речиси две третини откако Барак Обама е избран за претседател, но според „Гардијан“, причината за забрзаното заминување на американците од ирачката територија се должи на забрзаното опаѓање на рејтингот на претседателот на САД.

Последните анкети откриваат дека поддршката за Обама сега е под 50 отсто, додека прогнозите најавуваат пораз на неговата Демократската партија на ноемвриските избори за американскиот Конгрес, па затоа во Вашингтон се настојува да се обезбеди некаков успех на меѓународната сцена, што би помогнало за запирање на падот на популарноста на претседателот.

Стејт департментот и американското Министерство за одбрана затоа последнве месеци вложуваат големи напори за да го прикажат Ирак во позитивно светло, иако Ирачаните не веруваат во тврдењето на САД дека насилството во нивната земја е намалено, констатира лондонскиот весник.