Вашингтон, 5 февруари 2011 (МИА) - Американскиот претседател Барак Обама изјави дека промените во Египет мора веднаш да почнат и оти треба да доведат до демократски избори.
- Процесот на транзиција мора да почне веднаш. Успешната транзиција мора да има цел, а тоа се демократски и фер избори, истакна Обама додавајќи дека во процесот мора да бидат вклучени сите страни, а посебна одговорност имаат властите во Каиро.
Тој посочи дека насилството и ограничувањето на работењето на медиумите нема да донесе резултат. Обама потсети дека египетскиот претседател Хосни Мубарак веќе рекол оти иднината на таа држава ќе биде во рацете на Египќаните.
- Уверен сум дека египетскиот народ може да ја обликува иднината која ја заслужува, додаде американскиот претседател.