Техеран, 23 февруари 2011 (МИА) - Иранскиот претседател Махмуд Ахмадинеџад денеска ги критикуваше либиските власти поради „незамисливата“ репресија и ги повика светските лидери да ја слушаат волјата на народот.
- Незамисливо е некој да ги убива своите граѓани, да ги бомбардира своите граѓани, изјави Ахмадинеџад за иранската државна телевизија по повод ситуацијата во Либија.
Тој се запраша како е можно да им се нареди на офицерите да пукаат од автоматски пушки, тенкови и пиштоли врз сопствените граѓани.
- Тоа е неприфатливо. Нека зборуваат луѓето, треба да се слободни да ја изразат својата волја. Не треба да се спротиставува на волјата на народот, рече Ахмадинеџад.
Протестите во Либија почнаа на 15 февруари и досега според владини извори загинаа 300 луѓе од кои 111 војници.